माधव नेपाललाई गलाउन झलनाथसँग प्रधानमन्त्रीको वार्ता

४ वैशाख, काठमाडौं । प्रधानमन्त्री पुष्पकमल दाहाल प्रचण्डले नेकपा एकीकृत समाजवादीका सम्मानित नेता तथा पूर्वप्रधानमन्त्री झलनाथ खनालसँग पछिल्लो राजनीतिक घटनाबारे वार्ता गरेका छन् । आज बिहान दुई नेताबीच करिब एक घण्टा वार्ता भएको हो । वार्ता सुदूरपश्चिम सरकार गठनमा विपक्षलाई दिएको समर्थन फिर्ता लिनुपर्ने विषयमा भएको हो ।  

नेकपा एसका अध्यक्ष माधवकुमार नेपालले सत्ता समीकरणमा धक्का पुग्ने गरी सुदूरपश्चिम प्रदेशमा विपक्षी गठबन्धनलाई साथ दिएपछि प्रधानमन्त्री प्रचण्डले नेता झलनाथ खनालसँग आज यसै विषयमा छलफल गरेका हुन् । वार्तामा पछिल्लो राजनीतिक घटनाक्रम, सत्ता समीकरण र सुदूरपश्चिमको समस्या समाधानका विषयमा पनि छलफल केन्द्रित रहेको जनाइएको छ । 

उनीहरूबीच वैशाख १५ मा हुन लागेको उपनिर्वाचन, प्रदेश सरकार गठनका विषयमा छलफल केन्द्रित रहेको बताइएको छ । केन्द्रको सत्ता गठबन्धनमा सहभागी एकीकृत समाजवादीले सुदूरपश्चिम प्रदेश सरकार गठनमा नेपाली कांग्रेस र नाउपाको रेशम चौधरी पक्षको गठबन्धनमा सहभागी हुँदै नाउपाका लक्ष्मणकिशोर चौधरीलाई मुख्यमन्त्रीमा समर्थन गरेको छ ।

एमाले, माओवादीसहितको केन्द्रको सत्ता गठबन्धनका शीर्ष नेताहरूले एकीकृत समाजवादीलाई सुदूरपश्चिमको निर्णयबाट पछि हटाउने प्रयास जारी राखेका छन् । माओवादी केन्द्रका अध्यक्ष समेत रहेका प्रधानमन्त्री प्रचण्ड र एकीकृत समाजवादीका नेता खनालबीच आजको भेटवार्ता पनि त्यसैमा केन्द्रित रहेको बताइएको छ ।