संसद बैठक अगावै ओलीको राजीनामा आउने, अल्पमतको सरकार आजै बन्ने

२७ बैशाख, काठमाडाैं ।  प्रधानमन्त्री केपी ओलीले संसदमा अविश्वास प्रस्तावको पक्षमा बहुमत नजुट्ने निश्कर्ष निकाल्दै आजै पदबाट राजीनामा गर्ने निधो गरेका छन् । साथै, सबैभन्दा ठूलो दलको हैसियतले राष्ट्रपतिबाट आजै साँझसम्म शपथ लिने उनको तयरी रहेको छ । बालुवाटार निकट स्रोतले दिएको जानकारी अनुसार, संसदमा पराजित भएपछि ठूलो दलको हैसियतमा प्रधानमन्त्री बन्न संविधानको धारा ७६ को उपधारा २ आकर्षित हुन सक्ने भएकाले यस्तो निर्णय लिनु परेको हो ।

प्रधानमन्त्री ओलीले संसदमा विश्वासको मत लिनका लागि आजै प्रतिनिधिसभाको विशेष अधिवेशन डाकेका हुन् । तर संसद वैठक अगावै राजीनामा आउने भएपछि अधिवेशनको औचित्य नै समाप्त हुने भएकाले यस्तो चाल चल्न लागिएको देखिन्छ । यस्तै तिकडम वैशाख १९ गते लुम्बिनी प्रदेशका मुख्यमन्त्री शंकर पोखरेलले पनि गरेका थिए ।

बालुवाटार निकट स्रोत भन्छ – विश्वासको मत लिने वातावरण तयार नभएको र माधव नेपाल पक्षको राजीनामा समेत आउने देखिएपछि यस्तो रणनीति बनाइएको हो । संसद बैठक बस्नु अगाडि नै प्रधानमन्त्री ओलीले राजीनामा गर्ने तयारी भएको छ । दिउँसो १ बजेका लागि संसद अधिवेशन आह्वान भएको छ । सो अगाडि नै प्रधानमन्त्रीको राजीनामा आउने र राष्ट्रपतिबाट तत्कालै स्वीकृत गरिने गरी सेटिङ मिलाइएको पनि स्रोतले बतायो ।

साँझसम्म ओलीले संविधानको धारा ७६ को उपधारा ३ अन्तर्गतको सबैभन्दा ठूलो दलको संसदीय दलको नेताको हैसियतमा दोस्रोपटक शपथ लिने तयारी गरिएको पनि स्रोतको भनाई छ । यसरी गठन भएको सरकारले ३० दिन भित्र विश्वासको मत लिनुपर्छ, नभए संविधानकै धारा ७६ को उपधारा ५ बमोजिम प्रतिनिधिसभा भंग गरी ६ महिना भित्र चुनाव गराउनुपर्ने हुन्छ । अब ओली त्यही बाटो लागिसकेका छन् ।

त्यसैले उनको यो बाटोमा प्रमुख प्रतिपक्षी नेपाली कांग्रेस र जनता समाजवादी पार्टीसमेत सहमत हुने बुझाई ओलीको रहेको छ । ओलीको यो निर्णयबाट नेकपा माओवादी केन्द्र र माधव नेपाल पक्ष भने थप आक्रोशित हुने देखिएको छ ।