राष्ट्रपतिबाट बिदा भएकी भण्डारीको सक्रिय राजनीतिमा खेल सुरु

३० फागुन, माठमाडौं । सात वर्ष ४ महिना राष्ट्र प्रमुखको भूमिका निर्वाह गरेर सोमबारबाट बिदा भएकी निर्वतमान राष्ट्रपति बिद्यादेवी भण्डारी फेरी नेकपा एमालेको सक्रिय राजनीतिक भूमिकामा आउने चर्चा सुरु भएको छ । उनी शीतलनिवासबाट बिदा भएर छोरी उषाकिरणको घरमा गएसँगै उनलाई भेट गर्न पुगेका प्रायः एमाले नेताहरुले पुनः सक्रिय राजनीतिमा आउन सुझाव दिएका छन् । एमाले अध्यक्ष केपी शर्मा ओलीले यसअघि नै राष्ट्रपतिको जिम्मेवारीबाट फर्किएपछि उनी पार्टी राजनीतिमा सक्रिय हुने संकेत पनि गरेका थिए ।

विद्यार्थीकालदेखि नै एमाले राजनीतिमा सक्रिय रहँदै आएकी भण्डारी राष्ट्रपतिमा निर्वाचित हुनु अगाडीसम्म नेकपा एमालेको उपाध्यक्ष पदमा कार्यरत थिइन् । अहिले उनलाई पार्टीको सक्रिय राजनीतिमा आउनका लागि एमालेले उपयुक्त पद दिन नसकेपनि पार्टीमा विशेष महाधिवेशन गराएर भएपनि ल्याउने सम्भावना कायमै रहेको नेताहरु बताउँछन् । राष्ट्रपतिको जिम्मेवारी पुरा गरिसकेकाले भण्डारीलाई पार्टीको राजनीतिमा सक्रिय गराउँदा पदीय हिसाबले पनि उनलाई सम्मानित पद दिनुपर्छ ।

भण्डारीलाई फेरी सक्रिय राजनीतिमा आउन सुझाव दिने मध्येका एक नेताले भने, उहाँले चाहने हो भने कुनैपनि तरिकाले समावेश गर्न सकिन्छ । अहिले समय पनि बाँकी रहेको र अन्तर्राष्ट्रिय मान्यतालाई नेपालमा उदाहरण दिन सकिने भएकाले अब भूपु राष्ट्रपति भएर निस्क्रिय बस्नुभन्दा सक्रिय राजनीतिमा आउँदा उपयुक्त हुने देखेर यो सुझाव दिएको हो । प्रायः एमाले नेताहरुले भण्डारी फेरी सक्रिय राजनीतिमा आएको देख्न चाहिरहेको उनको भनाइ छ ।

पुष १० मा सत्ता गठबन्धन भाँडिएपछि एकाएक नेकपा माओवादीका अध्यक्ष पुष्पकमल दाहाल प्रचण्डलाई प्रधानमन्त्री बनाएर बाँकी संवैधानिक पद एमालेमा ल्याउने गरी राष्ट्रिय राजनीतिमा उदाएका ओलीले राष्ट्रपतिमा भण्डारीको कार्यकाल नसकिँदै पार्टी र सत्ता राजनीतिमा लामो उदेश्य राखेर गृहकार्य सुरु गरेको बताइएको थियो । प्रचण्डसँग भएको पुष १० को सहमति नतोडिएको भए प्रतिनिधिसभाको सभामुखसहित राष्ट्रपति पनि एमालेले नै पाउने थियो । राष्ट्रपति र सभामुख भएपछि उनले पार्टी जिम्मेवार तहमा ल्याउने नेता र प्रधानमन्त्री बनाउन योग्य व्यक्तिका लागि भूमिका बनाउन तयारी गरिरहेका थिए । तर, फेरी सहमति भाडिएर नयाँ गठबन्धन बनेपछि ओलीको योजनामा ठेस लागेको छ ।

एमालेका एक नेताले बताए अनुसार सहमति नतोडिएको भए साढे दुई वर्षपछि एमालेको प्रधानमन्त्री बन्ने पालो आउने थियो । त्यसका लागि उनले अहिलेका महासचिव शंकर पोखरेललाई उपनिर्वाचन लडाएर जिताउने र प्रधानमन्त्री बनाउने तयारी गरेका थिए । पोखरेललाई प्रधानमन्त्रीका लागि तयार बनाएपछि पार्टीको नेतृत्वमा निवर्तमान राष्ट्रपति भण्डारीलाई फेरी पार्टी राजनीतिमा सक्रिय बनाएर नेतृत्वमा ल्याउने ओलीको योजना थियो । त्यसमा अहिले ठेस लागेको छ ।

सहमति अनुसार राष्ट्रपति नपाउँदा पनि एमालेलाई खासै घाटा छैन् । प्रभण्डसँग भएको सहमतिअनुसार दुइवर्षपछि प्रधानमन्त्री नपाएको कुरा नेपालको राजनीतिमा भरपर्दो छैन । राजनीतले कुनै पनि बेला मोड परिवर्तन हुनसक्ने भएकाले अब भण्डारीलाई पार्टीको सक्रिय भूमिका र जिम्मेवार पदमा ल्याउन ओलीलाई खासै समस्या छैन् । अध्यक्ष ओली आफैले पटक पटक राजनीतिमा सधै एकै नीति लागु भइरहन नसक्ने भन्दै आगामी दिनमा नेपाली कांग्रेससँग पनि सहकार्य हुनसक्ने बताउँदै आएका छन । यी विषयहरुले पनि निवर्तमान राष्ट्रपति भण्डारी सक्रिय राजनीतमा आउने र नआउने विषयले खास अर्थ राख्दैन ।

अहिले स्वस्थ्य देखिए पनि ओलीको बिमार कुनै पनि बेला बल्झिने अवस्थामा छ । उनी आफु सक्रिय रहेकै अवस्थामा नेकपा एमालेलाई यही अवस्थामा हाक्न सक्ने उत्तराधिकारीको खोजीमा छन् । त्यसमध्येकी एक पात्र हुन विद्या भण्डारी । अहिलेलाई कुनै पद खडा गरेर पनि उनलाई पार्टीमा सक्रिया गराइए पनि भण्डारीलाई पार्टी नेतृत्वमा पुर्याउने उदेश्यमा ओली रहेको बताइन्छ । सके यही उपनिर्वाचनमार्फत भण्डारीलाई संसद छिराउने योजना पनि भइरहको छ ।

त्यस्तै ओली अब हुने उपनिर्वाचनबाट महासचिव शंकर पोखरेललाई संसद छिराउने तयारीमा छन् । नेताहरुको भनाइमा एमालेले निर्वाचनबाट सरकार बनाउने हैसियत नबनाएसम्म ओली आफु प्रधानमन्त्री बन्ने चाहानामा छैनन् । भोली अपरझट प्रधानमन्त्री एमालेबाट बन्नु पर्ने अवस्था आयो भने कसलाई पठाउने भन्ने उपयुक्त उम्मेदवार एमालेमा देखिएको छैन । यसले पनि उनले विश्वास गरेका पोखरेललाई यसको तयारी अवस्थामा राख्ने उनको चाहना छ ।

महासचिव पोखरेल र भण्डारी अहिले ओलीले पुनः नेतृत्वमा पुर्याउन चाहेका पात्र हुन् । सकेसम्म निर्वातमान राष्ट्रपति भण्डारीलाई सक्रिय राजनीतिमा ल्याएर गणतन्त्र नेपालको पहिलो महिला प्रधानमन्त्री बनाउने चाहना ओलीको रहेको एमालेभित्र चर्चा छ । कतिपय नेताले भने भण्डारीलाई तत्काल पार्टीको जिम्मेवार पदमा ल्याउन नहुने सल्लाह पनि दिएका छन् । भण्डारीले पार्टीकाे सक्रिय राजनीति सुरु गर्दा केही नेताहरुको पद धरापमा पर्ने अवस्था भएकाले पनि उनीहरु भण्डारीको विपक्षमा देखिएका छन् । राष्ट्रपतिबाट बाहिरिएको दुई दिन पनि नभएकाले भण्डारीको निजी विचार भने बाहिर आएकाे छैन् ।

उनी सक्रिय राजनीतिमा आउँछिन कि आउँदिनन् भन्ने कुरा भोलिको दिनले प्रष्ट नै पार्ला । तर, उनलाई सक्रिय राजनीतिमा आउन भने एमालेको ठूलो पँक्तिले दवाव सिर्जना गरिहेको छ । कतिपय नेताहरुले सार्वजनिक रुपमै भण्डारी सक्रिय राजनीतिमा आउने दावी गरिरहेका छन् । निवर्तमान राष्ट्रपति नेकपा एमालेको सक्रिय राजनीतमा फर्किने सम्भावना बढेको सार्वजनिक कार्यक्रममा नै एमाले नेताहरुले बताउन थालेका छन् । भण्डारी एमालेको राजनीतिमा फर्कन नमिल्ने, उभिन नमिल्ने भन्ने केही नभएको उनीहरुको तर्क छ । अन्तर्राष्ट्रिय अभ्यासले पनि भण्डारी चुप लागेर बस्न नमिल्ने चर्चा एमालेमा बढिरहेको छ ।