राष्ट्रपति पौडेललाई सीको बधाई सन्देश: ‘राजनीतिक विश्वासलाई मजबुत बनाउन चाहन्छु’

३० फागुन, काठमाडौं । नवनिर्वाचित राष्ट्रपति रामचन्द्र पौडेललाई चिनियाँ समकक्षी सी चिनफिङले बधाई दिएका छन् । राष्ट्रपतिमा शपथ लिएको भोलिपल्ट मंगलबार सीले सन्देश पठाएर बधाइ तथा शुभकामना दिएका हुन् ।

सन्देशमा सीले उच्च गुणस्तरको ‘बेल्ट एण्ड रोड’ निर्माणको क्रमलाई अघि बढाउँदै मानवीय आदानप्रदान तथा सहयोगका क्षेत्र विस्तारको काममा सँगसँगै अघि बढ्ने अपेक्षा गरेको बताएका छन् ।

विकास र समृद्धि उन्मुख युगौं युगसम्मको मैत्रीपूर्ण नेपाल–चीन सम्बन्धलाई उचाइमा पुर्याउन रणनीतिक सहयोगात्मक साझेदारीलाई निरन्तरता दिन आफू इच्छुक रहेको पनि बताएका छन् ।

सन् १९५५ मा दौत्य सम्बन्ध स्थापना भएयता नेपाल र चीनबीचको सम्बन्ध निरन्तर स्वस्थ तथा स्थिर रुपमा अघि बढिरहेको उल्लेख गर्दै राष्ट्रपति सीले यो सम्बन्धले ठूला र साना देशबीच शान्तिपूर्ण सहअस्तित्व, मित्रता र पारस्परिक सहयोगको उदाहरण देखाएको बताएका छन् ।

उनले दुई देशबीचको राजनीतिक विश्वासलाई मजबुत बनाउन राष्ट्रपति पौडेलसँगै मिलेर काम गर्ने इच्छा प्रकट गरेका छन् ।

भारतीय राष्ट्रपति द्रोपती मूर्मूले यसअघि नै बधाई शुभकामना दिइसकेकी छन् ।