कालोमोसो समूह राजनीतिक दलका युवा संगठनजस्तै हो : दुर्गा प्रसाईं

३० फागुन, काठमाडौं । मेडिकल व्यापारी समेत रहेका अभियन्ता दुर्गा प्रसाईले आफूले गठन गरेको ‘कालोमोसो समूह’ अन्य राजनीतिक दलका युवा संगठन जस्तै भएको बताएका छन् ।

समूहका राष्ट्रिय संयोजक शम्भु थापालाई प्रहरीले पक्राउ गरेको विषयबारे जानकारी दिन आज काठमाडौंमा आयोजित पत्रकार सम्मेलनमा प्रसाईले दस्ताका संयोजक थापालाई पक्राउ गरेर सरकारले संविधानप्रदत्त अधिकारमाथि उल्लंघन गरेको आरोप लगाए ।

उनले पछिल्लो समय ‘राष्ट्र, राष्ट्रियता, धर्म, संस्कृति र नागरिक बचाउ अभियान’को नेतृत्व गरिरहेका छन् । संयोजक थापालाई पक्रेर मुलुकमा अराजकता देखाएको समेत आरोप लगाए । टिसर्टधारी कालोमोसो समूहलाई थप विस्तार गरिने उनको भनाइ थियो । समूह गठन गरेपनि कालोमोसो दल्ने घटनामा संलग्न नभएको उनको दाबी छ । जाजरकोटमा लघुवित्तका कर्मचारीलाई किस्ता लिने क्रममा कालोमोसो दलेको घटनामा जोडेर प्रहरीले थापालाई चितवनबाट पक्राउ गरेको थियो । उनी साधारण तारेखमा छुटिसकेका छन् ।

‘माओवादी वाईसीएल, एमालेले युवा संघ, कांग्रेसले तरुण दल बनाउन हुने, हामीले समाजका ज्यादतिविरुद्ध अभियान चलाउन कालोमोासो दस्ता बनाउन नपाइने भन्ने कहाँ छ र ?’ प्रसाईले प्रश्न गरे । उनले समूहसँग डर मान्नुपर्ने कारण नरहेकाे बताए ।

समाजमा रहेका सामन्त वर्गलाई राज्यले नै संरक्षण दिइरहेको बताउँदै उनले अब स्वतः स्फूर्तः रूपमा देशका हरेक गाउँ र ठाउँबाट सामन्तहरूलाई ठेगान लगाउने अभियान चल्ने बताए । अभियानले सर्वहारा वर्गको संरक्षण गर्ने उनको भनाइ थियो ।

लघु वित्तको चर्को ब्याज र मिटरब्याजीको विषयमा किस्ता लिन आए कालोमोसो दल्न उर्दी लगाउँदै आइरहेका प्रसाई पत्रकार सम्मेलनमा नरम रुपमा देखिए । उनले आफूले ऋण तिर्न सक्नेहरुलाई तिर्न आग्रह गरेको बताए । बैंक तथा लघुवित्तको ज्यादतिविरुद्धको आन्दोलन देशभर जारी रहेको बताए ।