मधेश प्रदेश सरकारबाट बाहिरिँदै एमाले

२१ चैत, काठमाडाैं । प्रमुख प्रतिपक्षी नेकपा (एमाले)ले मधेश प्रदेश सरकारबाट बाहिरिने तयारी गरेको छ ।

पुस २७ मा जसपाका दलका नेता सरोजकुमार यादवलाई समर्थन दिँदै एमाले सरकारमा सहभागी भएको थियो । मधेश सरकारमा चार मन्त्रालय एमालेले लिएको छ ।

एमालेकाे मधेश प्रदेश संसदीय दलको बैठक बसेर सरकारबाट बाहिरिने तथा सरकारलाई दिएको समर्थन फिर्ता लिने तयारी गरेको हो ।

केन्द्र सरकारमा भएको सत्ता समिकरण फेरबदलसँगै सरकारबाट एमाले हटेपछि पप्रदेश सरकारमा पनि प्रभाव पर्दै गएको हो । एमाले मधेश प्रदेशमा सबभन्दा ठूलो दल हो । एमालेका २३ सांसद छन् ।

केन्द्रमा दोस्रो ठूलो दल एमालेको मुख्य पहल र समर्थनमा गएको पुस १० मा प्रधानमन्त्री बनेका माओवादी केन्द्रका अध्यक्ष पुष्पकमल दाहाल ‘प्रचण्ड’ फागुन २५ मा भएको राष्ट्रपति निर्वाचनमा कांग्रेससँग मिल्न पुगेपछि केन्द्रीय सरकार समिकरण भत्किन पुगेको थियो । त्यसैको प्रभाव क्रमशः प्रदेश सरकारहरुमा पनि देखिन थालेको हो ।