अबदेखि विद्यार्थीले स्वयंसेवक शिक्षक बन्न पाउने

२१ चैत, काठमाडौं । स्नातक र स्नातकोत्तर तहमा अध्ययनरत विद्यार्थीले स्वयंसेवक शिक्षक बन्न पाउने भएका छन् ।
विश्वविद्यालय अनुदान आयोगले सोमबार स्वयंसेवा कार्यक्रम सञ्चालन तथा व्यवस्थापन निर्देशिका र कार्यविधि पास गरेपछि उनीहरुले यस्तो सुविधा पाउने भएका हुन् ।

सामुदायिक विद्यालयमा विषयगत शिक्षक अभावले सिकाइमा गम्भीर असर परेपछि सरकारले उच्च शिक्षामा अध्ययनरत विद्यार्थीलाई स्वयंसेवक शिक्षकको रुपमा पठाउने तयारी गरेको हो । निर्देशिकाअनुसार स्वयंसेवक शिक्षक स्वेच्छिक हुने र उनीहरुले जुनसुकै क्षेत्रमा पनि काम गर्न पाउनेछन् । उनीहरुलाई ३ महिनाको निर्वाह भत्ता दिइनेछ । स्वयंसेवाको अवधि ३ महिनाको हुनेछ । त्यसभन्दा बढी समय सेवा गर्न चाहनेलाई रोकटोक नलाग्ने उल्लेख छ ।

स्वयंसेवक शिक्षकको रुपमा खटिने उच्च शिक्षाका विद्यार्थीहरुले तीन हजारदेखि पाँच हजार रुपैयाँ यातायात खर्च र ३० हजारदेखि ३२ हजार रुपैयाँसम्म निर्वाह भत्ता पाउनेछन् ।

ए ग्रेडमा पास भएकाले ३० र बी ग्रेडमा पास भएकाले २५ अंक पाउनेछ । योग्यता, हाजिरी र जान चाहेको क्षेत्रको आधारमा सबैभन्दा बढी अंक पाउने विद्यार्थी स्वयंसेवकको रुपमा छनोट हुनेछ । स्वयंसेवक शिक्षक विश्वविद्यालयले छनोट गर्ने र नियुक्ति पत्र पनि विश्वविद्यालयले नै दिनेछ ।

यस्तै कार्यविधिअन्ुसार विश्वविद्यालयले विद्यार्थीको योग्यता, हाजिरी र जान चाहेको क्षेत्रको आधारमा अंक दिन्छ । एक सय पूर्णांकमा जसले बढी अंक पाउँछ उसैलाई स्वयंसेवकको रुपमा छनोट गर्नेछ । दुर्गम क्षेत्रमा जान चाहने विद्यार्थीले बढी अंक पाउनेछ ।